مدونه زمان الوصل

خواطر2 :

هي عبارة عن مجموعة خواطر مررت بها خلال الأيام التي مضت وقمت بتدوينها ، فيه م يسر ويسعد وما يضيق لها الصدر ويكدر الخاطر ،،،

- يتبع -

بنات التأمينات :

رحت للمؤسسة العامة للتأمينات الاجتماعية في مشرف لاجراء بعض المعاملات ، والي لفت انتباهي في المؤسسة أن كالموظفات في المؤسسة محجبات إلا موظفة وحده ، والصراحة كان شي يفرح ويشرح الصدر إنك إتحصل بنات ديرتك ملتزمات بالحجاب وهذا ما تعودناه منهم ، بالإضافة إلى تعاملهم الراقي مع المراجعين والمرجعات ، حتى إنه وحده منهم كانت تكلم وحده من المراجعات كبيرة بالسن وتقولها يمه هالشي يصير وهالشيما يصير يمه لازم تويين جذي وجذي  ^_^ .. الله يثبتهم ويزيهم من فضله ..

عند الإشارة :

ذالك اليوم كنت في مطعم مع مجموعة من الشباب  ولما خرت وانا ماشي كنت اتكم بالتلفون وبدون ما انتبه للسيارة الصغيرة الي يمي لفيت عليها شوي ..!! ، وإلا فيها شاب أسمر لاحظته شوي عصب ويحق له الصراحة ، فلت اذا التفت صوبه بيعصب ولا يصارخ ولا يسب ولا شي ، فلفيت ويهي صوبه وابتسمت واشرت له اني آسف وحقك علي ^^” ، فعلى طول تغييرت ملام وي وابتسم وسلم ، عجبني الموقع الصراحة ، لأني لو مو مبتسع ولا اعتذرت جان يمكن عصب ، عجيب إن الناس شلون تتأثر بسرعة وشبابنا قلبهم طيب وفيهم الخير بس يبيلهم الي يعامله بالزينة علشان يردون بالمثل ^_^ ..

ابراهيم دكتور الأسنان :

ذاك اليوم قلت بروح أضبط ضرسي فقمت امبجر شوي ورحت المستوصف وخذيت معاي كتيب قلت اقرا وانا انطر الدول علشان استغل وقتي بشيي ميد بدال ما اقعد فاضي وخاصة ان علاج الأسنان لازم تنطر دور وفترة طويل ، وفعلاً خلصت جزء كبير من الكتيب ، وهم الحمد لله تييسرت الأمور ودخلت بوقت أسرع من الأوقات الفايته ، المهم يوم دشيت وإلا ذاك ادكتور سلمت عليه وصبحت عليه بالخير وقعدت ، وكانت معاملته راقية جداص وكا بشوش ويتغشمر ، حتى اني خذيت اسمه علشان أعالج عنده المرة الجاية ، وفعلا يا زن الدكاترة والعاملين إذا قابلوا الناس بابتسمه وأسلوب طيب ، ومافي أحسن من الاخلاق الطيبة ^_^ ..

جارنا:

في رمضان وانا راد البيت قبل الفطور بشوي وإلا جارنا الله يعطيه الصحة والعافية ، طالع من بيته ويمر على جم بيت من بيوتر الجيران ويطق الجرس وشايل بيده أكل متنقص منه للجيران ^^” ، شي غريب ما يسوونه الرجال عندنا لكن عجبني الي سواه وكبر بعيني ، يمر على الجيران ويوصل الأكل بنفسه ويبلغهم السلام عند الباب واهو الي ماشي . الله يكثر من أمثاله ويعطيه الصحة والعافية ..

المجاهرة بالفطر:

من الشغلات الي عجبتني من وزارة الداخلية اهي تغريم ومخالة ” المجاهر بالفطر” في نهار رمضان ، وقريت خبر عن مخالفة كذا شخص في أو الأيام ، والله يجزاهم خير ويعطيهم العافية على هالشي الي يسوونه لأنه مخالف للدين والقانون والأدب والذوق العام … والله يوفقكم يا الداخلية ^_^ ..

بيع الملابس في القوى العاملة!!:

وهم مرينا ذاك اليوم هيكلة اقوى العاملة وأنا أكلم الموظف عن معاملتي وإلا الي يايه تكلمه تقوله فلانه شفتي شغل أختي ..؟ ، انا هني استغربت قلت شنو شغل اختها الي بتقولها عنه الحين وموقفين معاملتي علشانه ..!!!

وإلا الحجية اختها تبيع صديريات ولبس قرقيعان حق اليهال..!!! ، أنا الصراحة قعدت أضحك وأقول الحمد لله والشكر ..!! ، بغيت أنط لهم وأوقلهم عندج صدريات حق أخواني الصغار ..!!! صج الي اختشوا ماتوا..!!

التخطير والعوض!:

ذاك اليوم وأنا في برج الحكومة مول هم أسوي معاملة من معاملاتي الي ما تخلص والي معذبينا الحكومة فيها من مكان لي مكان وطلبات ما تخلص ..!! ، المهم وانا رايح وناطر عند الباب مع خلق الله وشوي وإلا ذاك الريال الي ياي يسأل شلون شالموضوع ، قالوا له انطر شوي بيبون ورقة نسجل أسماءنا بالدور ،وصل الحارس معاه الورقة ورحنا نسجل أسماءنا بالدور وفي ناس احترمت الدور ، يه هالحبيب ويخطر الكل ويسجل إسمه وإحنا قبله من قرن ونص ..!! ، صج بط جبدي لأنه ما احترمنا ولا احترم الدور ولا احترم نفسه ، قلت رمضان وصايم بمشيها له ، ويمو دخلنا داخل طلعت معاملتي ما تحتاج رقم فخلصت شغلي قبله ^^” ، سبحان الله شلون مشت الأمور بهالطريقة ^^ ..

اعتذار:

أعتذر عن التأخر في الكتابة مع كثرة تواجدي في النت لكن أحياناً ما أشتهي أكتب شي وكثرة الإنشغالات تغلني زيادة وزيادة ، والله يعيينا على الشغل الي ما يخص ^^” ..

وفي الختام ، هذي بعض الخواطر وفي غيرها وايد ، لكن نؤجل منها شوي ونذكره في أوقات قادمة ، وترقبوا المواضيع القادمة بإذن الله ^_^ ،،